(च्वापुका:चा छमा सिमाया क्वय् सतरन्जा लाना:, फुंगा छ्गलय् अडेस नया:,ग:पतय् स्वाँमा छमा: क्वखाना: अनसन च्वनेगु तयारी यानाच्वनीबले च्वाकिंचा थ्यंक वै |)

च्वाकिं:      (पत्या: मजूगु भावं)....का....का...थ्व च्वापुका:चां छु यायेत्यंगु थ्व.....सिमा क्वय् च्वना: ध्यान याइपिं ऋषिमुनी जुइत्यंगु ख:ला ? कि गथे अय् च्वापुका: ?

च्वापुका:     थौंकन्हय्या थ्व २१औं शताब्दीइ थथे सिमाक्वय् च्वना: तपस्या याइपिं ऋषिमुनी जुइपिं गन का:वनेगु ? थौंकन्हय् ला भट्टीइ भट्टीइ तपस्या या: वनीपिं सिसीमुनित ग्वा:ग्वा: दुका मैं.....

च्वाकिं:      वहे ला अचम्म जुया: छं छुयाये त्यनागु धका: न्यानागु नि जिं.....छगु खँ न्यने धका: स्व:सा मेगु खँया बयान यायेत पासम्ह छ....

च्वापुका:     आ: थनयागु क्रियाकलाप....वातावरण स्वयेबले न्ह्याम्हेस्यां तुरुन्त धायेफुनि अनसन च्वने त्यनागु धका:....छं जक छाय् अनुमान यायेमफु ?

च्वाकिं:      छथें ज्या:म्ह झतिंगर अनसन थें ज्या:गु महान ज्याय् च्वनी धका: अनुमान यानाच्वनी ला जिं क्या:....

च्वापुका:     छं छु जित: चानचुनम्ह....चापा:म्ह मनू धका: च्वनागु ला आम्थे धायेत....छं जित: म्हहे मस्यूनी च्वाकिं...छु धायेगु छन्त.....

च्वाकिं:      छु धायेगु जित: मखु....छु धायेगु छन्त धायेमाल का जिं....अनसन च्वनीगु ज्याय् थौन्कन्हय् hit जुयाच्वंपिं india म्ह वहे अन्ना हजारे ख:....कि ट बाबा रामदेव....मखुसा नकतिनी hit जूम्ह झिगु हे देशय् च्वंम्ह टिचिंग हस्पिटलया डाक्टर साब जक ला ख:नि....छ छाय् जान्या जूवय् मा:गु थज्या:गु ज्याय् ?

च्वापुका:     थ्व अनसन च्वनेगु ज्याय्.....जिं पहल मयासे जिहे मजिल, अले छु यायेगु ले ?...सर्वसाधारण जनतां निसें कया: नागरिक अगुवात फुक्कं मौन.....सुंक च्वंच्वंगु दु | मनोंकी छुं हे मजू थें, अले ?

च्वाकिं:      मखु छं धाये त्यनागु छु ? याये त्यनागु छु ?

च्वापुका:     छु मचा पह: वयेक न्यना च्वनागु जिके....धाधां हे खँ मथू धैगु नं दैला....झीथाय् देशय् नं इन्डियाय् थें चरम रुपं बढय् जुयाच्वंगु भ्रष्टाचार विरोधी आन्दोलन न्ह्याकेत सुं न्ह्य:ने व:गु खं ला छं....भ्रष्टाचारं याना: देशया अवस्था जर्जर जुइ धुंकूगु खंक खंक आ: छु सुंक लातां केरा स्व:थें त्वालां च्वंच्वनेगु अवस्था दु ला ?

च्वाकिं:      व अवस्था ला पटक्क हे मदु....न्ह्याथाय् स्व:सां भ्रष्टाचार....न्ह्याग्गु या:सां भ्रष्टाचार....भ्रष्टाचार जक मखु आ:ला चार....पाँच.....छ....सात.....जुजुं असंख्य जुइ धुंकल.... (च्वापुका:या समर्थन यायां) ख:....ख:....का च्वापुका:....छं थुपालय् तसकं ठीक निर्णय या:गु दु.....छंगु समर्थनय् जि नं अनसन च्वनेगु....सकलसित अनसन च्वनेत आह्वान नं यायेगु....

(धाधां च्वाकिंचा नं छपा: चकटी लाना: अनसन च्वनेत फ्यतुइ)