च्वाकिं भर्सेज च्वापुका: 

(च्वाकिं व च्वापुका: छ्कू कोठाय् च्वना: पत्र पत्रिका खुब नकसां ब्वना च्वनी । ब्वं ब्वं वं वैत वं वैत न्ह्यस: लिस: नं यानाच्वनी ।)

च्वापुका:   गय् च्वाकिं ! क. प्रचण्ड ला प्रधानमन्त्री बाबुराम भट्टराई नं राजीनामा बिलकी ला देश हे डुबय् जुइ धका: धाल नि !

च्वाकिं:     वय्क:नं भचा: खँ मथुल जुइ का ....देश डुबय् यायेत राजीनामा बिया च्वने हे म्वा:नि ....थ्व मनसुनं nonstop 15 न्हू तक वा वलकि देश ला अथें डुबय् जुइनि ...इ छु थ्व समाचार ब्वं ले ....वीरगन्ज डुबानय् ला:गु । अले कन्हय् कंसा न्यंले कोशीइ खुसिबा: वया: डुबानय् ला:गु खँ त

च्वापुका:    अले स्वले थ्व मेगु पत्रिकाय् छु च्वयात:गु क. झलनाथ खनालं धा:गु प्रधानमन्त्रीं राजीनामा मब्युतले लँ प्रष्ट जुइ मखु हं ...

च्वाकिं:      वय्कलनं क. प्रचन्डं खँ मथुथें खँ मथुलका ...लँ प्रष्ट यायेत प्रधानमन्त्रीं राजीनामा बियाच्वने हे म्वा:नि ...लँ अथें प्रष्ट जुजुं वनाच्वंगु दुनि ....उखुनु लाजिम्पाटं निसें महाराजगन्ज तक लँ प्रष्ट जुल ...म्हिग: नयाँ बानेश्वरं निसें पुलां बानेश्वर तकया लँ प्रष्ट जुल ....अथे हे कन्हय् कंसा  हानं छ्थाय् निथाय्या लँ प्रष्ट जुजुं वनी ...

च्वापुका:     हे  भगवान ! थ्व च्वाकिं नं ...अर्थया अनर्थ ...आग्राया खँ ह्वाग्रा याना: जिगु न्ह्यपु हे नैगु का ....

च्वाकिं:    मा:गु मदु जित: छंगु न्ह्यपु नयेत ...आम्ज्या:गु गोबरं जा:गु न्ह्यपु नयेत ज्या मदुला जि ...कमसे कम म्येया न्ह्यपु जुस म्वा:ल धायेका ...अझ खसीयागु न्ह्यपु जुसा माक्कुक सवा: कया: नये धायेका ...भट्टी पसल्यातय् न्हिं न्हिं न्ह्यपु फ्राई म्युम्युं लिमला: ....का म्वा:ल न्यं थन ....व सुशील कोइरालां सीधुंकुगु संविधान सभा हानं म्वाकाहयेगु खँय् deligation वंपिन्त आश्वासन बियाहल हँ ...

च्वापुका:    व सीधुंकुगु संविधान सभा म्वाकेत छुकिया आश्वासन बिया च्वनेमा:गु ....खुरुक्क सीधुंकुगु गिरिजा प्रसाद कोइरालायात म्वाकाह:सा ला तन्ता हे साफ नि ....न्हापा हे वैत राष्ट्रपतिया पद छ्गू इनामय्  बियाब्युगु जूसा थौं थ्व दयाच्वनीगु ला का ....न राष्ट्रपति पद छगू मखना: सास: ल्हाय् ल्व:मंकिगु वय्क: नं !

च्वाकिं:    छं ला तसकं हे च्वापुका:गु खँ ल्हात का च्वापुका:....थज्या:गु छंगु खँ न्यना: हे जुइ व कमल थापाचां सीधुंकुगु राजसंस्था म्वाकेगु खँ ल्हाना ह:गु ....

च्वापुका:    वं खँ ल्हात धायेवंतुं 'व थाय् थासय् वना: मन्दिर मन्दिर चा: चा: हुला: राजसंस्था म्वायेमा: धका: पुजा पाठ यायेमा:म्हेस्या वाइनया गिलास न्ह्य:नेतया: टि.भिइ इन्टरभ्यु बीगु ख्याल: क्वंवये ज्यूला ? आँट गनं वल धैम्ह का जि ? 

च्वाकिं:    आँट धैगु गनं वइ उलि नं मस्यू ला छं ? आँट धैगु झ्वाम्म त्वनकी वैका ....वाइन त्वं त्वं इन्टरभ्यु ब्यूगु धैगु मखुला छं ? 

च्वापुका:   व ला ख:, तर न्हापा सात दलं राजसंस्था ल्यंका हे तयेगु धका: सहमति या:गु हे ख: धका: धक्कु त्व:तूगू त्व:तलं बा .....माधव कमरेडं ला अथे छुं हे मखु मखुगु खँ ल्हाना जनतायात मिखाय् धुलं छ्वाकूगु धका: धालनि ...

च्वाकिं:   आ: अथे मखुगु खँ ल्हाइम्हेसित ....जनतायात दु:ख बीत स्वैम्हेसित न्हापां निसें देश निकाला याइगु चलन हे दु .....गथांमुग: खुन्हु भूतयात पितिना: बौ बीगु थ्वहे सिलसिलाय्  ख:सा कन्हय् ठ्याक्क गथांमुग:....गथांमुग: चित्त साला: खुसिइ वायेयंके  न्ह्य: वा झी नं छक: हाले आजु जय....हा...

च्वाकिं भर्सेज च्वापुका: 

(च्वापुका: ल्हा: म्हूचिना: तसकं आन्दोलन याय्गु मूडय् मुर्दावाद धका: हालाच्वनी । च्वाकिं वैत सम्झय् याय्त स्व्याच्वनी ।)

च्वाकिं:     मखु अय् च्वापुका:....हानं छुकिया लागि आन्दोलन याये त्यनाम्ह छ ? संविधान सभा तुमपाकुं छयां  जुया: कन्हय्  खुन्हु हे सुदुर पश्चिमान्चलया व:नहु मछिया कष्टकर आन्दोलन रहश्यमय ढङ्गं स्याप्प सुप्प हे  दिउगुलिँ आ: बल्ल याउँसे च्वन धका: अनन्दया सास: ल्हाना च्वनां....थ्वं हानं आन्दोलन चर्के या बा......छु सुकुम्बासी तय्त वागमतीं थनाछ्वल धका: आन्दोलन यानाम्ह ला छ ? 

च्वापुका:     छु सुकुम्बासी थनाछ्वल धका: आन्दोलन याइम्ह सुकुम्बासी थें च्वंला जि ?

च्वाकिं:      अथे मखुसा छु सुकुम्बासी तय्त हिमाल सिमेन्टि कारखानाय्  थाय् बिइन, सुन्दरी घाटय् थाय् बिइन  धका: उमित अन तये दइमखु धका: आन्दोलन यायत्यनाम्ह ला छ ? 

च्वापुका:    अज्यागु चापा:चा चिपा:चा गु खँय् आन्दोलन याइम्ह थें च्वंला जि ?.....व सुकुम्बासीतय्त गनं व:गु ख: अन हे लित छ्वयाब्यूसा खँ हे सिधल नि .....राजधानीइ हे छाय् थाय्  मा:गु उमित ?

च्वाकिं:     छाय् ... छाय्.....का.....न्यंहुँ ले वरिष्ठ नेता तय्के ह ......अले छं थ्व खँय् नं मखुसा छु खँय्  आन्दोलन याय् त्यनाम्हा छ ? कि सेना समायोजनय्  धाँधली यात धका: आन्दोलन याय् त्यनाम्ह छ ? 

च्वापुका:     सेना समायोजनय् धाँधली यात धका: जिं छाय् आन्दोलन याय्माल....वला लडाकु तय्सं हे छु छु यय्मा:गु याइ....छु छु धायेमा:गु धाइ....

च्वाकिं:     उमिसं धयां गन जी धया ? ....अनमिनं धया थकुगुला छुं लागु मजु....झ्यल्ला याइपिन्त सुनां फइ....अम्पायर नं उपिं हे ....रेफ्री नं उपिं हे .....लाइन्सम्यान नं उपिं हे .....थज्यागु खँय् छं आन्दोलन यानां जिइ ला ? 

च्वापुका:     थ्व खँय् आन्दोलन याये त्यनागु मखु धका: धाय् हे धुन नि जिं ....

च्वाकिं:     अले थ्व नं मखु, व नं मखु सा छु कला: सित धका: आन्दोलन याये त्यनाम्ह ला च .....ख: ले सा ? 

च्वापुका:     ब्याहा हे मयानानिम्हेसिया कला: गनं सी ? म्वा:मदुगु खँ  ल्हाना च्वनी....देशय्  अपाय्माछि धंगु घटना घट्य जुलं नं थ्व च्वाकिंचां स्यूगु मखु का .....खालि ब्याहा ब्याहा धका: ख्या: यायेत जक ता:ला का छ ह....

च्वाकिं:       देशय्  छु शत्रुतय्सं हमला याय्वलला छं आम्थे धायेत....त:धंगु हे विपद वल कि छु ? 

च्वापुका:      त:धंगु विपद मव:सा जि छुं वेंचा:म्ह खिचा ला थथे मुर्दाबाद धका: हाला जुइत ? एयरपोर्टया व्यवस्थापन विदेशी कम्पनी यात व नं इन्डियन कम्पनीयात ल:ल्हायेगु ज्या धैगु छु देश्या सुरक्षा कर्पिन्त ल:ल्हाय थें मजू ला ? थज्या:गु घोर आपतिजनक खँय् नं छंगु छुं चासो मदु का मखु ला ? 

च्वाकिं:       चासो ला स्व च्वापुका:.....व झी राष्ट्रपतिया सिबें अप्व: दुका जि....व झी प्रधानमन्त्री सिबें अप्व: दुका जि....व मन्त्री नेता आदि इत्यादि पिनी सिबें गुलिखय्  गुलि दोब्बर त्यब्बर देशया सुरक्षा....सार्वभौमसत्ताया बारे चासो दुका जि ...

च्वापुका:      अले अथे नशा नशाय् देशप्रेम बा: बा: वनाच्वंम्हेसिगु ताल थज्या:गु ला थज्या:गु राष्ट्रघाटि ज्या जुलं नं छंगु हि ख्वाउँसे च्वंगु का मखु ला ....चुपका मखु ला छ ? 

च्वाकिं:      जि चुपचाप छुं हे मखु ...मात्र थुलि ख:कि थ्व खँय् गुलि सत्यता दु व माला च्वनाम्ह ख: जि ....नहाय्पं यंकल धका: क्व:या ल्यूल्यू ब्वाँय् जुइ न्ह्य: सत्य तथ्य छु ख: थुइके मा: धैगु मान्यता जक ख: जिगु 

च्वापुका:     ठिक जु च्वाकिं ....यदि थ्व खँ सत्य ख:सा सुयातं बाँकि तयेमज्यू ....अले थ्व खँ असत्य ख:सा षड्यन्त्रकारी तय्गु भण्डाफोर यायेमा: > 

(निम्हेसियां अथे हे यायेमाली धैगु भावय् छ्यं संकी ।)

च्वाकिं भर्सेज च्वापुका:

(म्हिग: तक्क छपाँय व छ्धी धका: नापनापं जुयाजूपिं च्वाकिं व च्वापुका: थौं पार्टी निकू टुक्रा जुइवं पार्टीया न्हापागु सम्पत्ति व ज्याकुथिं निसें कया: चिकिचिकिचा धंगु वस्तु व चीजया खँय नं तेस्सरी मेस्सरी यायां ल्वाना च्वनी)

च्वाकिं:  खबरदार ! च्वापुका:.....आम टेबुलया द्य्ने च्वंगु पेन्सिलयात छं थी दैमखु ....that thing belongs to me

च्वापुका:   छ अप्व: जान्या जुइगु मखु नहाँ च्वाकिं ...छं आम पेन्सिल कटर कया: थ्व क्वथा पिहां वने धका: वाक्का नं तय्म्वा: ....don’t touch my belongings

च्वाकिं:     स्व च्वापुका: ....आम कम्प्युटरया मोनिटर जिं हि च:ति हाय्का: थ्व ज्याकुथिइ तय्है तैगु

च्वापुका:    छं छु फुर्ति याना .....थ्व कम्प्युटरया CPU जिं मह:सा आम मोनिटर चलय जुइ धका: च्वनाला ...बडा आया झाँसीकी रानी....

च्वाकिं:     अय्सा छं थ्व जिं हैतयागु मेच चुपिं पाला: टुक्रा टुक्रा याना व्छय्गु बिचा: जुइका मखुला छ लखनऊया नवाब या......

च्वापुका:    यदि छं थ्व जिं हैतायागु डेस्क व्हाना व्हाना व्छ्य्गु बिचा: दुसा जिं जक आम मेच छाय् बाकि तय् ?

च्वाकिं:    अय्सा जिं हुँ ट्युबलाइट जक छाय् बाकि तय्...जि जक ज्यूसा ताछ्याना हे बिइ ...

च्वापुका:   छं छाय् तछ्याय् माल...जिं ट्युबलाइटया चोक हे ज्वना वनेगु जुसेंलि छं नं फुसा यांकिले

च्वाकिं:   छु जि छ्थें फ्वगिं धका: च्वनाला जाबो अज्यागु चवन्नीगु ट्युबलाइट छेंय् ज्वना वनेत...ज्वना हे वनेमा:सा जिं हुँ laptop हे जुक्केका ....

च्वापुका:   मदय्क मगा: धका: छ गिद्ध मिखायात व laptop लुटय् याके बिइका जिं जि माँ या काय्सा ल्हा: पालेगु जुइ ...

च्वाकिं:    का पाला स्व सा जिगु ल्हा:....छं स्वय् जिं छुं मस्यु धका: च्वनाला.... छंगु नियत, व पिनेच्वंगु मोटर साइकल ब्वाका यंकेगु सुर धका: जिं स्युनि ...जिं           लातकि आम मोटर साइकल गय्त चासूगु निपा तुतिं पं त्व:थूथें ट्वाकराक्क त्वथुलेगु जुइ....अले सिइका छं ...

च्वापुका:    अय् च्वाकिं ... छ अप्व: aggressive जूइगु मखु न्हा आम्थे...जब झी निम्हे सिया लंपुहे बाया वने धुंकुसेंलि.....छं जित लाक्वपाक्व धाय् दै मखु न्हां...न्ह्याम्हेस्यां न्ह्याग्गु धा: थ्व थाय् व थ्व थाय् छ्फुति धू तक्कं जिमिगु हक दु ...जिमिगु ख: मेपिं स्वैगु मखु

च्वाकिं:    जिं लातकि आम म्हुतुइ च्वंगु म्ये छपुतीं च्वाट्टमिंक  चफुना बिइगु जुइ ...थ्व थासय् ....थ्व थासय् च्वंगु छगु छगु दत्तले चीजबीज फुक्कं जिमिगु ख:...मात्र जिमिगु बाहेक स्वैगुं मखु.....सुनां थिइ दैमखु  थन......now get out from here....

च्वापुका:   you get out from here...छंगु थन थौं निसें छुं अधिकार मदु

च्वाकिं:   अधिकार या हे खँ ल्हाय्गु ख:सा ....जिमिसं न्हापां कब्जा याना तैगु थाय् ख: थ्व.....छु फुइँ याना च्वनागु छं.....

च्वापुका:   आम्ज्यागु कब्जा...चुकु.....ता:फ्व:....ता:चाया खँ ल्हाना थ्व थाय् छिम्सं काय्त काशी वना वा चुला वंसाँ दैमखु मैं ....

(निम्हं थथे हे तेस्सरी मेस्सरी यायां ल्वाना च्वनी बले लाक्क छम्ह सरकारी पह: व:म्ह मनू वै...अले निम्हे सितँ क्वथा पिने व्छ्या मूलुखाय् तालं ग्वया खुरुखुरु वनी च्वय्या अर्दर धका:...निम्ह “हिस्स बूढी खिस्स दाँत” याना वना च्वंम्ह मनूयात वाता स्वैच्वनी)