(च्वाकिं व च्वापुका: देशया थाय् थासय् जुया च्वंगु सत्ता पक्ष व विपक्षया शक्ति प्रदर्शन व आन्दोलनया बुखँ न्यं न्यं गफ याना च्वनी)

च्वापुका:       का च्वाकिं .....सिल मखुला छं .....आ तिनी बल्ल न्ह्यैपुइगु जुलका .....थ्व आन्दोलन इन्दोलन मजुया ....प्रदर्शन प्रिदर्शन मजुया लाइफ हे बोर जुया च्वंगु धया ......

च्वाकिं:        छंगु लाइफ बोर जुया च्वंगुला .....छिमि वाइफ बोर जुया च्वंगु ख: .....व विषय खँय् लिपा खँ ल्हाय् ....दकले न्हापांला आ: सत्ता ढलय् जुइगु जुल धका: बय्बय जुया च्वंगु दु ....उकिया बारे खँल्हाले ....

च्वापुका:      ग्व ? सत्ता ढलय् जुइगु ख:ला ....नेतात धलं धलं ब्वाँय् जुइ मालिइगु ख: सुनां छु स्यु ....

च्वाकिं:       थ्व च्वापुका: नं छु खँल्हाइ छु ! ....आन्दोलन बलेनं सुं धलं धलं ब्वाँय् जुइला ....न्हापा न्हापा आन्दोलन जुइबले छ जि सतकं सतकं ब्वाँय् जुइगु मखुला धया .....ल्वमनला छं ?

च्वापुका:      अज्यागु प्रजातन्त्र .....लोकतन्त्र ....गणतन्त्र ......व: गु आन्दोलन ल्वमंसा ....जिमाँया काय्सा जिला म्वानागुया छुं अर्थ हे दैमखु .....छु खँ ल्हानागु छं ?

च्वाकिं:        नेवा: खँ ल्हानागुका नेवा: हsss छं म्वानागुया अर्थ दैमखु धयाँ छुयाय् ....झीत अज्यागु ऐतिहासिक  आन्दोलनय् होमय् या:पिं  झी नेतातय्सं ग्वलेसा उकिया अर्थ थूगु? ग्वलेसा उपलब्धीयात संस्थागत या:गु ?

च्वापुका:      अथे संस्थागत याय् ख: सा थथे न्हि न्हि खिचाल्वा:थें ल्वाना च्वनीला ? ....न थथे अविश्वासया वातावरणहे सिर्जना जुया च्वनी ?

च्वाकिं:        मखु धया थ्व अविश्वास या वातावरण सिर्जना या:पिं सु धया ? जिला छक्क ....छं न्हिन्हि न्यना च्वनागु दुलाकि मदु ......गबलें फलानां झंग: लाइन धका: हाला हैगु ....गबलें धिस्कानां पंग: थन धका: घुर्की क्यनीगु ....थथे याना जी ला ?

च्वापुका:       जी ला मलय् ला का ......मसला अप्व:गु ....चिन्व:गु जक खंल्हाका सुंक लातां केरा स्व:थें त्वालां स्वै च्वनीपिं झी जनतात नं गय् च्वं .....उमिगु छेंनय् झ्वाँय्क्क झिकूचा व्हाय् मालनी झीसं .....

च्वाकिं:      झिकूचा व्हाय्माल धका: जक जिलला ....दकले न्हापां तापक्या क्वाकेमाल ....अले लिपा चिकं क्व्य्केमाल .....उसके बाद तिनी झिकूचा तया गन ख: अन झ्वाँय्क्क झिकूचा व्हाय्गु जुइ लाटा ......

च्वापुका:      हे भगवान ! थ्व च्वाकिंचां छु खँ ल्हा:गु जुइ .....जिं  धैगु मतलब .....देशयात गति बिइ मफुपिं मतलबी पिन्त तउँ तउँ खौ छ्याय् माल धैगुका झीसं ....

च्वाकिं:        छ्यात मखुला खौ ? .....अथे मौकाय् खौ  छ्याय् फ़ूगु जूसा थौं व संविधान सभा झौ जुइनि न व संविधान वै धैगु आश हे झौ जुइ

च्वापुका:    हsss वहे दक्वं दाक्वं उपलब्धित झौ जुया हानं back to mangalman जुइ धका: ला आ: न्ह्याथ्थें यानासां चुनाव याकेत दबाब बिइ माल धैगु जिं  ......

च्वाकिं:       चुनाव याय्त याकेत दबाब बिया च्वनेमा:गु हे मदु ..... चुनाव याय्त याकेत तयार मजूपिं सु दु  ....चुनाव याय्त फुक्कं तयार धका: धैच्वंगु दु .....तयारी यानानं च्वंगु दु ....अय्नं वातावरण तयार हे मजू धैम्हका जि
(धा धां निम्हं छगू हलुवाई पसलय् थ्यनी। अन छम्ह हलुवाईनं धमाधम जेरी छुया च्वनी गुईं गुईं नीका। च्वाकिं व च्वापुका: नं व हे जेरी गुईं गुईं नीउगु स्वया वातां च्वनी) 

(Mr. च्वापुका: व Ms. च्वाकिं ‘६३’ या स्वरूपय् च्वनेमा:पिं ‘३६’ या स्वरूपय् च्वना: फुईं फुईं यानाच्वनी)

च्वापुका:      मखु छ जि नाप न्ह्याबलें छाय् थथे तेस्सरी मेस्सरी याना हा: वैच्वनेगु...ल्वा: वैच्वनेगु...आखिर छ व जि थ्व थासय् साझा शत्रुयात सिधय्का थ्यंगु मखुला?

च्वाकिं:       जिं लातकि छेंनय् झिकूचा व्हाना बिइ...छं खँ मथूगु खना जिला छक्क बा.... जि गन च्वापु गुइँ पाखे लिइम्ह छ गन क्वा: ज: अप्वइ थाय् जुइम्ह...झीगु मिलन गुबलें जुइ फै?

च्वापुका:      (तमं) छहेका फै...छिमि अबु फै का....छिमि बाज्या फै....छिमि घाँय् घाँय् बाज्या फै का...अथें कर्पिन्त फै धा: वै...

च्वाकिं:       जिं धया नि...छंगु दिमाग थासय् मला: धका:...मनू हे कर्मय् नकिं.....अले गनं जिइ...धैगु खँ छु ख: धका: ध्वाथुइक सिइके मा: धैगु स:गु मखु अथें जागय् जुया च्वनी...छंगु लँपु व जिगु लँपु....छंगु सिद्धान्त व जिगु सिद्धान्त फरक फरक जूसेंलि झी न्ह्याब्लें नापं च्वं च्वनेगु गय्?

च्वापुका:      सुनां नापं च्वं धा:गु दु छन्त...थौंकन्हय् कला:पिंला नापं मच्वने धुंकूगु जमानाय् छला छुँ ईया लागि सहयात्री जक.... I damn care you !

च्वाकिं:       Damn care सा Damn care.... छन्त सुनां धा:गु दु जित: care या धका:...छंगु थ्वहे पह: नं यानाला झीगु सहमति मजूगु

च्वापुका:      वल वल फसिक्वा: वल वल पाउँक्वा...थ्व सहमति धा:गु शब्द न्यं न्यं बुरा जुइन जि...उकें थ्व शब्द न्यंके मते जित:

च्वाकिं:       छन्त मन्यंकूसा स्वैत न्यंकेगुले....छ हे दकले न्हापा थ्व शब्दयात बुइकूम्ह ख: थें....आ: जिं सहमति याय्त न्ह्याब्लें तयार धका: न्ह्याक्व धा:सां शब्द जालय् जक तक्यंकल धका: बय् बय् याना जुइगु....अले?

च्वापुका:      अले मखु धलेका....छ थ: चाहिं माक्कूक बले च्वनेगु, जित: धा:सा धले क्वफाय्गु गन तक जायज खँ थ्व?

च्वाकिं:       स्व च्वापुका:....जिं छुँ नाजाय्ज ज्या याना जुयागु मदु....छं हे जित: थ्व थासय् व्छ:गु ख: थें...आ: छं थन च्वने मखन धका:...जित नाजाय्जया आरोप बिइगु बाँला:गु खँ मखु... हीमी चाया जक जी मखु...

च्वापुका:      जी नं मखु...माले नं मखु... जिं छु जी मले धका: तरकारीइ तय्गु मसलाया खँ ल्हाना च्वनागुला व? न जीं ब्याट्रीइ मसला फूगु खँ हे ल्हानागु ख:...जिंला...आ: छंगु ई फूगु खँ ल्हाना च्वनागु मैं....

च्वाकिं:       थु...थु...थु.....हाय्क थू....का ई फुतला जिगु म्हुतुइ....जाय्क ई...दनी जिगु म्हुतुइ....

च्वापुका:      (तमं) छंगु जक म्हुतुइ ई....दुला...का जिगु नं म्हुतुइ ई....दु....का थू....थू...थू.....

(निम्हेस्याँ वं वैत वं वैत थु...थु...थु...थु...याना ई फुका च्वनी)

(देशया राजनैतिक परिस्थिति खना: वाक्क दिक्क जुया कपा: स्याका: छ्यों तिया न्ह्कुई सन्चो बुबुं च्वाकिं व च्वापुका: गफ याना च्वनी)

च्वापुका:      मखु अय् च्वाकिं....थ्व देश्मरुगु देशय् आ: छु जुइगु जुल? जिंला पटक्क हे अन्दाज याय् मफुत बा....जित: जिमि मस्तय्सं य: बा:!....आ: झिथाय् देशय् छु जुइगु जुल धका: न्हिच्छीं न्य जक न्यना: हाय्ल काय्ल याय् धुंकल !

च्वाकिं:       छन्तला हाय्ल काय्ल जक याना च्वनका...जित:ला जिमि मस्तय्सं थ्व देशय् च्वनेहे मखुत...विदेशय् वनांतुं त्वते धका: ख्याच्व बिया हय् धुंकलका....जिं जिमि मस्तय्त थ:गुहे देशय् च्वना पौरख ब्वय्मा: धका: आदर्शया खँ ल्हाना तैगुला झौ हे जुइगु जुल च्वापुका:.....

च्वापुका:      जिं लातकी छेनय् तौं तौं खौ छ्याना बिइ....आदर्श झौ जुल हँ....थन देश हे झौ जुइन ला कि छु धका: अनेक शंका उपशंकात मनय् ग्वाराग्वारा दासि वया: आ: झीगु देशय् छु जुइगु जुल धका: न्यनां तिप्यंक जवा: छगू बिइगु मखुका हुँ......

च्वाकिं:       हुँ नि फुँ...तिप्यंक जवा: बिइत तिप्यंपिं नेतात नं द्य्माल नि थ्व देशय्....छं मस्यूला कि मथूला कि...कि सुनां मस्यूगु खँ थ्व ?

च्वापुका:      स्यू धया ग्वलेसा? सुं छम्ह चुइँक्क नवा:गु मखु? या:या: थें याका: देश झ्वाकलय् दुना वना च्वंगु तमासा स्व: थें सुंक स्वया: ज्यानजिन मदुपिं कतांमरी पह: वय्का: सुंक च्वंच्वंगु दु सकलें....

च्वाकिं:       वहेला धैगु नि...याय्गु छु धैगुका याय्गु छु? Remote Control छथाय् दु...सनीपिं robot झीथाय् दु....याय्गु छु धैगुका? गुली विवश यानात:गु झीत.....(झसुका:)

च्वापुका:      वहेला स्वरे ! आन्दोलन याय् धा:सा....छु कियात आन्दोलन याय्गु? व्यवस्था हे परिवर्तन याय्त ०७ सालय् आन्दोलन याना....४६ सालय् आन्दोलन याना....६२/६३ आन्दोलन याना थौं देशय् प्रजातन्त्र....लोकतन्त्र...जुजुं गणतन्त्र थ्यंक वय् धुंकल...आ: आन्दोलन छु कि यात याय्गु?

च्वाकिं:       ग्व गणतन्त्र व:गुला मनपरीतन्त्र व:गु......जनतायात राहत गुबलें दूगु मखु....थिके नं त्य:गु त्यलंतुं…..सर्वसाधारणया जीवनस्तर क्वहां वंगु वनं तुं......संबिधान छगू न्हूगु वैला.....स्थिर राजनैतिक अवस्था जुइला धैगुनं वीरवलया खिचडी जुइ धुंकल....

च्वापुका:      ए बाबा...पुरा ह्याउँमस्तथें व सत्ताया लागि....प्रधानमन्त्रीया कुर्सी छ्गूया लागि भैरव राग हा:गु हालं तुं.....सत्ता हे मा:गु ख:सा खुरुक्क चुवाव याना व्छसाला जि हे जिल नि....सुनां त्याकिइ वैत ल:ल्हाहे ल्हाइनि.....मा:गुया थ्व बालहठ ला धया?

च्वाकिं:       थुपिं जिं स्वय बले मनूत हे मखुथें च्वना वैगु...पुरा खिचाया संस्कारय् ब्वलंपिं थें....व्हाउ व्हाउ याना: ल्वाना च्वंगु आ: ख: ला.....बिचं छम्ह वया सत्ताया लापाँय् कवाप्प नै वनी आले स्व:गु स्वलंतुं जुइमालिइ बले सी का....

च्वापुका:      मखु आ: थुमिगु बुद्धि बुइकेगु निम्ती नं सप्ताह याय् मालिइगु ख:ला कि कालीबाबा हे स:ता आश्वमेघ यज्ञ याके मा:गु ख:

च्वाकिं:       (म्हिचां coin छग: लिकाना) आ: अथे मखु च्वापुका:....थ्व coin गाई-त्रिशुल याय्गु हला....छु वल व अनुसार न्ह्या वनेगु (धाधां coin आक्सय् वाँ व्छै.....coin बंय् जू वै बले...नं गाई जुइ न त्रिशुल जुइ....याउंक ‘ठाडो’ जुइक थिंगरिंग दना च्वनी)  

(च्वापुका:चा स्वाँनं निसें वल वल धाधां च्वाकिंचिगु क्वथाय् स्वात्त दुहां वै)

च्वापुका:     (लय्तातां) वल वल आ:ला धात्थें हे वल भाइसा.....

च्वाकिं:      (च्वापुका:चिगु पह: खना छ्झा: वैत तुंक स्वै) छु ताल याम्ह मनू ख:ल्या:...छु वल वल धका: ) ०७ साल यागु डाइलग दोहरय् याना च्वंगु जुइ....छु वल धैगु ?....न्हूम्ह प्रधानमन्त्री वल धैगु लाकि....देशय् धमाधम नय्द्य:त खने दया वल धैगु?

च्वापुका:     हँय्......अज्यागु सुप: छुया ह्यंग्वा: मजुइगु खंयात नं जि वल वल धाइला

च्वाकिं:      अले छु वल वल धैम्हले छ? कि मेलम्चीं ल: वल....त्रिशुलीं मत वल धैम्ह

च्वापुका:     आ: अज्यागु ‘आकाशको फल आँखा तरी मर’ धैथें ज्या:गु खँ वल धका: जि लय्ताइला?

च्वाकिं:      अय्सा पक्का नं छ तलब थाहाँ वल बजा: भा: क्वाहां वल धका: लय्तातां जित: कं व:म्ह जुइका मखुला?

च्वापुका:     य.....माँ.......सा.........अज्या:गु संसरया नम्बर वान ‘जोक’ नं लय्तातां कं वैला जिं? भचा थय्क्क गेस याले गेस !

च्वाकिं:      ग्व छु गेस याय्गु ? प्रहरी प्रशासनय् इमान्दारीता वल.....नेपाल सैनिकय् सदाचारिता वल धाय् धा:सा झन झन अ:ख: अ:ख: खँ न्यने दु......

च्वापुका:     हे भगवान.....थ्व च्वाकिंचां गनया खँ गन यंका स्वाय्त सना च्वंगु......जिं अथे प्रहरी प्रशासनय्, सैनिक तय्के इमान्दारीता वल धका: धैगुहे मखु....

च्वाकिं:      अय्सा छं नेपा:या राजनीति गथि गथि जुया स्वात्तूमतु स्वया वल....उकें गथि फेने मफया नेतातय्के लज्या दया वल धका: धाय्त्यंगु जुइका मखुला ?

च्वापुका:     मखु अय् च्वाकिं...थौं छन्त छु जूगु हं?.....आम्थे छं धा:थें झी नेताजुपिंके लज्या दयाव:गु छंगु आम बाला बाला चिंगु मिखां गुबले खना धैम्हका जि ? .....उमिके धाथें अथे लज्या दूगु जूसा मिनेट मिनेटं खँ पाका च्वनीला ?

च्वाकिं:      (हीमी चाचां) उमिसं खँ पाकूसां मपाकूसां छं नि न्हाच: निसें खँ थाका च्वनका थ्व धा:सां मख....व धा:सां मखु ह....का final धाय् जिं आ:.....छं पक्का नं व एमाले व काँग्रेसं पिहां व:पिं जनजाति तय्गु न्हूगु पार्टी खने दया वल धा:गु जुइ ख:ला ?

च्वापुका:     हरे शिव शिव.....गपाय्सकं जक खँ थुइके थकूम्ह च्वाकिं नाप संगत याय् ला:गु जिं.....छन्त ला छन्त धाम.....धाम....धका: न्यंकूसा छं जित: मधा: मधा: धका: धाइम्ह ख्वा: व:का

च्वाकिं:      (तमं) अले छंगु छ्यों....छं न्हाच: निसें छु वल वल धका: जिगु प्रेसर हाइ याय्त स्वैच्वनागु?

च्वापुका:     (न्हिला:) cool baby cool.....जिं न्हाच: निसें आ:ला धात्थें वल धका: धैगु...कन्हय् लक्ष्मी पूजा...उकें धात्थें कंसा न्हू दँ वल धका: धैगुका...का छन्त नेपाल सम्बत न्हू दँया लसताय् भिंतुना.... न्हू दँ थुगुसिइ न्हू न्हूगु ह्यूपा: स्वय् दय्मा

(च्वाकिं नं same to you धाइ, च्वापुका: नं ल्हा: मिलय् याइ) 

(च्वाकिं व च्वापुका: नकतिनी क्वचा:गु मोहनी थुगुसिइ गथे जुल थें धका: खँ ब्याका च्वनी)

च्वाकिं:      का च्वापुका:....छंगु पह:चह: स्वय्बले....थुगुसिइया मोहनी छन्त खूबनक्सां फापे जूगु खने दु....गथे?

च्वापुका:     गथे मखु खँ थथे का....मोहनी वल कि जित न्ह्याबलें बहनीका....पसल्यातय् पसलय् ताउत तक्क ब्वहनी याय् मखनी बले हीमी चा:थें मोहनी वलकि अथे का जि....

च्वाकिं:      छ च्वापुका: धैम्ह्ला न्ह्याबलें औंसीया चन्द्रमाका...पुरा खिमिला....नेगेटिभ बाहेक सकारात्मक खँ ल्हाय् धैगुला घाँय्घाँय् बाज्याया पालंनिसें....मस:पिं....

च्वापुका:     सकारात्मक खँ ल्हाय्त नेपालय् छु दु धैम्ह्का जि आम्थे छं खँ ल्हाय्त अले जित हास्यव्यंग्य कार्यक्रम व ख्याल:खय् थें ध्याचु नकेत....

च्वाकिं:      सकारात्मक कथं सोचय्या:सा हरेक वस्तु बाँला:गु खने दै.....नकारात्मक ढंगं सोचय् यात धा:सा गुलाफ स्वाँ नं कँ कँ जक जुया सुया वै.....बस ! खँ थुकथं थुइकेमा:का बाबु....

च्वापुका:     का बा बा.....अय्सा सकारात्मक ढंगं सोचय् याइम्ह छ च्वाकिं नं हे धा:सा....छंगु मोहनी गथे च्वनले ?

च्वाकिं:      जिगु मोहनी ला? हुँ......जिगु मोहनीला सुनां चाय् मफूगु भुतुमालीथें चकाचकका जिगु मोहनीला चकिचकि न:गु भुतुमालीथें का....जिगु मोहनीला एक नम्बरया माजा दूगु सुका थें का....सुनां थिल कि चय्त

च्वापुका:     मोहनी धैगु छंगु लागि खाली भुतुमाली ब्वय्केगु जक का मखुला छं आम्थे धाय्त....

च्वाकिं:      जिं आम्थे धैगु गन ख: धका:.....जिंला मोहनी धैगु व्यापारी तय्गु लागिं बम्पर उपहारया बहार नं ख: धका:ला धाय् हे मखं नि छन्त...कने हे मखंनि छन्त

च्वापुका:     हे भगवान! थ्व च्वाकिंचां नेपा:या लग:धग: मदुपिं नेता तय्सं खँ ल्हा:थें छु खँ ल्हाना च्वंगु....सके छंगु दिमाग १२ बुँदे/४ बुँदे/७ बुँदे/५ बुँदे सहमति....सहमति धाधां थ्व ६२/६३ या जनआन्दोलन धुंका: निसें या भैरवी राग न्यंन्यं खुस्कय् जुलला कि छु ?

च्वाकिं:      मोहनीया नानां कथंया बम्पर उपहार ला:म्हेसिगु दिमाग नं खुस्कय् जुइला पाक:....बम्पर उपहार ला:म्हेसिया ला वाल छ्याल जुइका बाबु....वालछ्याल...

च्वापुका:     छंगु खँ न्यनाच्वनागु स्वय्बलेला वालछ्याल मखु....देशया राजनीति छ्यालब्याल जू थें जुया च्वंथें च्वंका.....खाली बम्पर उपहार धा:गु दु....लय्ता:गु दु, आखिर थ्व बम्पर उपहार  धा:गु छु व खुलय् याय् मालका द:...स्पष्ट याय् मालका द:

च्वाकिं:      मोहनी बले पत्रपत्रिका मवल धाय्वंतुं FM, रेडियो, टि.भी. नं मस्वैम्/मन्यनीम्ह मनू लातकि छु छ?...मोहनी...अझ थुगुसिइया मोहनीया बम्पर उपहार धका: घोषणा याना त:गु धैगु....सहमति सिइमति छुं मखु after मोहनी/स्वन्ति आन्दोलन धका: ध्वांग फुकय् याना च्वंगु गथे मता: धैम्ह्का जि छ ख्वाँय् नं ?

(च्वापुका: छं खँ मथुया वातां च्वंच्वनी) 

(च्वाकिं व च्वापुका: चेम्बर अफ कमर्सय् राष्ट्रपतिया भाषण न्यने धुंका: हलं पिहां ववं खँ ल्हाइ।) 

च्वापुका:       मखु अय् च्वाकिं थ्व झी सम्माननीये राष्ट्रपतिं छु नवा:गु ?

च्वाकिं:          का छ च्वापुका: नं उलि नं मस्युगु ला .......वय्क: नं नेपाली नवा:गु का .......

च्वापुका:        थ्व च्वाकिंचा छम्ह धा:सा .....खँ यात लखं पिका:म्ह न्या थें फाताफाता पुइकीगु हे मय: .....झी राष्ट्रपतिं जि संविधानया रक्षक धका: छु धायेत्यंगु जुइ धका: न्यनागुका छंके । 

च्वाकिं:           छं स्वये छु वय्क: नं जि संविधानया भक्षक ख: धका: धायेमा:गु धका: धाये त्यनागु ला छं ? 

च्वापुका:         वल वल फसिक्वा: ....वल वल फसिक्वा: .....आग्रा दिग्रा पाक्क छाय् खँ  ल्हायेमा:गु धया छं ?

च्वाकिं:            छं गय् मथूगु धया च्वापुका: ......वय्क: नं झीके छु न्यंगु मता:ला छं ? आ: जिं संविधानया रक्षा यायेगु ला कि ? पालना यायेगु ला कि ? व किताबयात धुं बीगु, मत बीगु ? ....पूजा यायेगु कि रक्षा यायेगु धका: question mark त:गु ख: लाकि मखु ? 

च्वापुका:        ख: धया .....बिल्कुल ख: ......उकें ला जिं छंके न्यनागु नि .....वय्क अपाय्सकं छाय्  कन्फ्युज जुया दिउगु धका: ? देशया 

अपाय्धंम्ह राष्ट्रपतिं थ:गु रोल हे मस्यूगु खै मखु ? 

च्वाकिं:           छाय् ? राष्ट्रपति छिमि ज्वाँइ सा'ब परे जुलकि छु ? साप माया याना: मस्यूगु ला खै मखु धका: सपोर्ट यात। 

च्वापुका:        राष्ट्रयाम्ह हे पिता यात छु ज्वाँइ सा'ब ज्वाँ सा'ब धका: डिमोसन यायेत स्वैगु छं ? 

च्वाकिं:           थ: थम्हं डोमिनेट जुइत स्वयाच्वंम्हेसित जिं छाय् डिमोसन यायेमल? .....सुनां सुनां छु छु धाल .....ग्वाकल .... हावा तल धायेवं बेलुन फुलय् जू थें फूलय् जुया: ध:गु थ्व पोष्टया स्थापना छुकिया लागि यानात:गु धैगु खँ ल्व:मंके ज्यूला ? 

च्वापुका:        छ नं म्वा:मदुगु हे खँ ल्हानाच्वनी धया ......गन बेलुन फुलय् जूथें फुलय् जूगु दु धया वय्क: .....वय्क:ला पन्चर जूगु टायर जूगु टायर थें थौंकन्ह्य् स्याप्प च्वंच्वंगु दु का .....

च्वाकिं:           अले अथे पन्चर जुइ धुंकुगु टायर जुइमा: वा ट्युब जुइमा: ....दकलय् न्हापाँ पर्के माल नि ....अथें  न्ह्य:ने ला: थें नवाना जुइ मज्यूनि ....का ख: ला कि मखु ? 

च्वापुका:         ग्व ? ख: धयेगु ला मखु धायेगु ला ? ख: धायेधा:सा वय्क:यात यइमखु .....आपदला थन थाय् लाक्क धका:ले सा ....

च्वाकिं:           का च्वापुका:......आ: आपत-सापतया खँ त्व:ताछ्व .....जो होगा देखा जाएगा .....कंसा घटस्थापना न्ह्य: .....संविधान सभा पुनर्स्थापना जुइ मखु थें .....नं चुनाव हे जुइ उकें सकल सित मोहानीया लसताय् भिंतुना का ....का हुँ (निम्हं न्हिली) 

(नेवा सन्देश weekly, october 15, 2012)

(च्वाकिं व च्वापुका: छ्थाय् च्वना: भेराभेर यानाच्वनी वहे राजनीतिया खँय् |)

च्वाकिं:       स्व च्वापुका: छ अप्व: जान्या जुयाच्वनेमते.....खुरुक्क जिं धैथें ‘चुनाव’ यानाछ्वये नु

च्वापुका:      मदयेक मगा: धका: छं धा:थें यायेमाली का.....जिं धा:थें ‘पुनर्स्थापना’ यायेत छं छाय् आनाकानी याना च्वनागु?

च्वाकिं:       मखु छ चुनावय् वनेत व ‘हरर’ फिल्म स्वैपिं थें छाय् फ्यारफ्यार खाना च्वनागु ग्याना:?

च्वापुका:      (तमं) छिमि अबु ग्या:सा का....! छिमि बाज्या ग्या:सा का !......छि घाँय्घाँय् बाज्या ग्या:सा का ब:र कर्पिन्त अथें ग्याफरा धका: प्रमाणित यायेत्यंगु जुइगु का मखु ला ?

च्वाकिं:       (च्वापुका:या तँ खना:).....का....का....का जिल ला आ:?......मनूतय्त ख:गु भिंगु सल्लाह बी मज्यू धा:गु धत्थें हे ख: खनीका....अथें अथें तंचाइगु बा....छु छं चुनाव यात कि धेबा खर्च जुइ....पुनर्स्थापना यात कि किफायेत जुइ धका: आनाकानी यानाच्वनाम्ह ला ?

च्वापुका:      (हिमी चाया:) छिमि बाज्याया छ्यं....चुनावय् वनकि चुन चुनके बदला लुंगा धका: झी जनता जनार्दन परमेश्वरत हालाच्वंगु मता:लाकि छु छ न्हाय्पं ख्वाँय् नं.....

च्वाकिं:       छ हे क न्हाय्पं ख्वाँय्....छ उल्लू के पठ्ठें स्वैत ख्वाँय् धायेगु स्वैत खुसीं धायेगु हे ल्व:मंगु का मखु ला....मिजंतय्त ख्वाँय्...मिसातय्त खुसीं धाइका मुर्ख....

च्वापुका:      छ क मुर्ख.....पुनर्स्थापना याना: माकुक्क स्याये धैगु मस:गु गय् ? मा:गुया झन्झट ला चुनाव-सुनाव याना:.....धेबां धेबा मजू.....जि वं जिउ मजू...

च्वाकिं:       मखु धया....छ च्वापुका: नं गथे मथूगु धया झिथाय् नेपालय् चुनाव धैगु स्वयेत तसकं आपुलु जुइ धुंकल धका: बालिग जुइ धुंकुपिं मस्तय्सं क्वाँइ क्वाँइ याना: छुट्टि....उपिं प्वाथय् दुबले छक: हे भोट कुर्के मखंनि धका: त:धंगु गुनासो का....उकें...

च्वापुका:      गुनासोया हे खँ ल्हायेगु ख:सा....थन नेपालय् खँ ल्हानां साध्ये जूला? छुकिया जक गुनासो मदु.....ल:या धाये ला, ध:या धाये ला, बिजुलिया धाये ला, फोहरया धाये ला? महँगीया खँ ल्हाये ला.....रामायण व महाभारत च्वयां सिधैमखु.....सगरमाथा सिबें त:जा: जुइका ‘गुनासो’ या पहाड....थन गुनासो याना ला: ला

च्वाकिं:       अले अथे मला: धका:....छु जिन्दगी भर चुनाव यायेम्वा:ला थन ?

च्वापुका:      न्हापां खुरुक्क पुनर्स्थापना यायेगु अले मालंमा:थें यायेगु का....

च्वाकिं:       (हिमी चाचां) मखु चुनाव हे यायेगु का.....(निम्हं जोरका तोर नक्सां थ:थ:गु खँ तै)

च्वापुका:      (अन्तय् जि हे मजिया:) का अय्सा ‘गाई त्रिशुल’ यायेगु (धाधां क्वाइन छग: लिकाइ)

च्वाकिं:       का का.....आ: मेगु छुं विकल्प मदुसेंलि थ्वहे ठीक जुइ.....जित: त्रिशुल | क क्वाइन तिन्हुइकि....

(च्वापुका: नं क्वाइन आकाशय् वां छ्वै | च्वय् वना: क्वाइन बँय् जुइबले ‘थारो’ जुया: न त्रिशुल, न गाई जुइ | निम्हं वातां जुया: वं वैत, वं वैत स्वै)