(च्वाकिं व च्वापुका: छ्थाय् भ्वय् वनेत ट्याक्सी पियाच्वनी। ट्याक्सीत धा:थाय् वने मानेय् मजुया: दिक्क जुयाच्वनी। ख्युंसे च्वं लिसें निम्हेसिया मन पिपि च्यानाच्वनी। ) 

च्वापुका:    (हिमीचाचां) थ्व ट्याक्सीवाल तय्त नं छ्यं हे तज्याक्क दायाछ्वये मास्तेवैगु द:। बहनी गनं वने मालकी न्ह्याबलें टेन्सन ....

च्वाकिं:     छ्यं तछ्याये धयां छु याये, टेन्सन कयां छु याये ...थज्या:गु समस्या create याइपिन्त कारवाही यायेमा:पिन्सं याइगु मखु ....अले उल्टां थ:गु हे जक कपा: स्या: 

च्वापुका:    कपा: स्या:गु ला खँ हे ल्हायेमते ....मेट्रोपोलिटन सिटि धका: धाइगु ...पिने पिने विदेशय् महानगर धायेबले गज्या: गज्या:गु सुविधा दै ....झिगु महानगरय् धा:सा बहनी 8 बजे जुल कि सुनसान ....विदेशीतय्गु न्ह्य:हे मछा:से हे च्वंका ....गज्या:गु समस्या थ्व .....

च्वाकिं:     अथे हे समस्या जुया: ला खै नि येँ महानगरपालिकां आ: ट्रायलया लागि बहनी 8 बजे निसें 11 बजे तक्क night bus चलय् या:गु जुइनि ...

च्वापुका:     बस ला चलय्  यात, लिपा हानं अथें थचक्क बसय् जुइगु ख: ला ? 

च्वाकिं:     आ: व थचक्क बसय्  यायेगु वा फटाफट चलय् यायेगु धैगु ला फुक्कं झी हे नगरवासी तय्गु ल्हा:तय् ला ख:नि ....थुकियात सकारात्मक रुपं कायेगु ख:सा ठीक जुल .....मखुसा 

न्ह्याग्गुं नकारात्मक रुपं जक कयाच्वंसा छुकिया नं विकास जुइमखु 

च्वापुका:    थपाय्चकं बहनी बहनी ट्रान्सपोर्टटेसनया समस्या जुयाच्वंगु इलय् थज्या:गु सुविधा उपलब्ध या:गु यात नं नकारात्मक रुपं का:सा ला थ्व सिबें लज्जास्पद खँ मेगु छु दै? 

च्वाकिं:     मेगु छु दै? ...लज्जास्पद खँ झ्वामगुलुतय्गु दु का थौंकन्हय् मा.प.से. याना: झ्वामगुलुत थ:म्हेस्यां गाडी, मोटरसाइकल चलय् याये मखना: हिमी चायाच्वंगु इलय् थ्व night bus नं याना: उमित ला चिट्ठा ला: थें लानाच्वंगु दु का ....सोह्रय् सत्र ....

च्वापुका:    गज्या:गु अलपत्र खँ ल्हा:गु जुइ छं ....छु थ्व बस सेवा  झ्वामगुलुतय्गु लागि संचालन या:गु ख:ला आम्थे धायेत ....अथे ख:सा बसय् च्वनीपिं सुरक्षा गार्डतय्सं उमित घोक्रेथ्यांक नका हयेमाल का .....

च्वाकिं:     उमित ला म्वा:ल धायेका अथे यायेत थाकुइ मखु ....तर नगरवधुतय्त छु यायेगु ले ....थौंकन्हय् नगरवधुयतय् डेटिंग यायेगु थाय्  हे night bus जुया तसकं अ:पुया च्वंगु दु छं ..... 

च्वापुका:    आ:.....थीथीगु सामाजिक विकृति यात थीथी कथं हे सम्बोधन यायेगु थ:गु हे थासय् दु ....तर अथे जुल धका: धायेवं थ्व night bus या बांला:गु सुरुवातयात झीसं तिब: बी हे मा:....

च्वाकिं:     कासा अय्सा थौं झिसं हे तिब: बी ....झी छाय् ट्याक्सी पिइगु ले? नु, रत्नपार्कय्  वना: night bus गया: झी गन वनेमा:गु ख: अन वने। Lets go ! (निम्हं वनी)