च्वाकिं भर्सेज च्वापुका:

च्वाकिं भर्सेज च्वापुका: 

(च्वापुका: इरुथिरु यायां पाल्हातय्  मुर्किं दादां पुतुपुतु हालाच्वनि। च्वाकिंया जि हे मजिया: न्यनी।)

च्वापुका:     मखु धया च्वाकिं....जि ला तसकं कन्फ्युज जुल बा......

च्वाकिं:       छ च्वापुका:....दिमागय् न्ह्याबलें फ्यूज वनीम्ह कन्फ्युज जुइमा:गु छाय् ? 

च्वापुका:     खँ हे कन्फ्युज जुइगु जुसेंलि न्यने नं मज्युला छंके? अथें डाइलग नकाच्वनी का....

च्वाकिं:       आ: छु याय्  ले ? मेमेगु नके धा:सा दक्व दाक्वं थिकय् .....न्याना नके मफु .....डाइलग नकेत धेबा पुलेमा:गु मखु ....अले थौंकन्हे नेपालय्  दकले सितिकं ला:गु धैगु हे डाइलग.....एमालें काँग्रेसयात....काँग्रेसं माओवादी यात.....माओवादिं फोरम यात....आ: जुजुं म्हिग:ला कमलचां फुर्ति नकसां दक्व दल तय्त् मा:री खत्रा खत्रा डाइलग नका: त्व:तल । 

च्वापुका:     वहे ला कन्फ्युज जूगुनिं जित:......आ: लाखे देशय् संविधान धैगुहे मदु हँ ....उकीं 47 साल यागु संविधान हयेमाल हँ ....राजतन्त्र हयेमाल हँ ...जिला छक्क का.....

च्वाकिं:      छ हे छम्ह जक छक्क का....म्हिग: कमल चिगु सभाय् मुनाच्वंपिं मनुत छक्क मजू क्यारे । उम्सं ला तन्त्रै तन्त्रया देशय् .....कहिले सासुको पालो, कहिले बुहारीको पालो जु हे जुइ ....104 दँया एकतन्त्र .....07 सालया प्रजातन्त्र......17 सालया पन्चायततन्त्र .....हानं 46 सालया प्रजातन्त्र ....62 सालया लोकतन्त्र जुजुं गणतन्त्र व:गु थ्व देशय् हानं छक: राजतन्त्र वयां छु पाइ धाल नि सा .....

च्वापुका:      पा ला छु पात धका:....थौं उलिमछि तन्त्र वयां हे देशय् विकासया लँपुइ छ्पला: न्ह्या:वनेफुगु मखु....संसारय् दकले बांला:गु The Best तन्त्र धैगु हे स्वतन्त्रत ख:। Freedom ख:। ग्वले सा छु पात ? झी नापनापं स्वतन्त्र जूगु देश गनं गन थ्यने धुंकल । झी धा:सा झन् झन् back to मंगल मान 

च्वाकिं:       धाय्बले छु छ नं अवसरवादी जुया: कमलचिगु पार्टीइ दुहाँवने त्यनागु ला की छु ? कि छन्त नं पँचिंक खनखन गोपाल बिया: खुलामन्च जायेकेगु ज्याय् खतय् या:गु ? 

च्वापुका:       स्व: च्वाकिं बरु जि नय् मखना: सिनावने । तर व ई फाए धुंकूगु पार्टीया खँ न्यना: 250 वर्षया सामन्तवाद अन्त जूगु अले 60 वर्ष बाद व:गु, बल्ल तल्ल दूगु लोकतन्त्र गणतन्त्र स्यायेगु ज्या कदापि सुनां याये मज्यू मज्यू....जिगु पाखें ला वाक्का: हे तयेम्वा:। 

च्वाकिं:      मखु धया झीथाय् थुलिमछि तन्त्र वया: नं देश विकास यायेगु, देश समृद्ध यायेगु मन्त्र छगू छाय् सुनां दयेके मफुगु धैम्ह का जि ...प्रधानमन्त्री, मन्त्री जुइगु मन्त्र धा:सा दक्व पार्टी तय्के दु हँ ...सत्ताय् च्वना: ग्वामग्वाम भत्ता नयेगु मन्त्र अचम्म नकसां निर्माण जुइगु हँ ....देश विकसया मन्त्र छगू जानाजानी मद्येकूगु ला कि छु थूमिसं !

च्वापुका:     प्रजातन्त्रवादी शक्तितय्  थ्वहे अलमल तन्त्रं याना: थौं संविधान सभा भंग जुल ....म्वा:ल का ......चुनाव याना:सां हानं संविधान  दयेकेगु लँय्  वने धका: घोषणा जूसां .....मखु 26 दल या शक्ति प्रदर्शन  यायेगु धका: द्वन्द  सिर्जना जुइगु ज्याय्  लिमला: फमला: ब्वाँय्  जुया: शक्ति प्रदर्शनया नामय् ल्वाप्पा नयेमा:सेंलि प्रतिक्रियावादी तय् सं छ्यं ल्ह्वना महइ ला ले ? 

च्वाकिं:       वहे ला धैगु नि गन 26 दल ....गन एक दल ....एक दलया  शनिबारया  शक्ति प्रदर्शनया न्ह्य:ने 26 दलया सभा उलिंचिया बाखं थुलिंचा का ....छगू लक्ष्य ज्वना: न्ह्या:व्नाच्वंपिं अन्दोलानया सहयात्रीत एकताबद्ध  मजूसे द्वन्द सिर्जना यायेगु ज्याय् लगय् जुइगु गन तक्क जायेज का धासा । 

(निम्हं सहमति यायेमा: धैगु खँय्  मौन सहमति याना: सुंक च्वनी ।)