च्वाकीं भर्सेज च्वापुका:

च्वाकीं भर्सेज  च्वापुका: 

(च्वाकीं व च्वापुका: छथाय् दुवात य् च्वना: बन्द सफल यायेत मा: मा: कथं ग्वसा  ग्वयाच्वनी । नापं निम्हसिया दथुइ अन्दोलानया सवालय् थी थी सलह नं यानाच्वनी) 

च्वापुका:  मखु अय्  च्वाकीं....झिसं थ्व आदिवासी जनजतिया सवालय् स्व्न्हु बन्द यानाच्व्ना...तर ग्व ? उखुनु तिनि आदिवासी जनजातीखय् सुचीकृत जुपिं छम्ह हे आदिवासी जनजातीया प्रमुख व महत्वपूर्ण आन्दोलनय् तिरिक्क गनं खनेमदु गय् ? 

च्वाकीं:   (छवाराक्क  मिंक  न्हिली) हि..हि..हि...हि.....छु धया ? झुलुक्क गनं खनेमदु धया ला ? हि...हि...हि....

च्वापुका:  (खँ मथुया: वातां च्वना: न्यनी) क....क...क...छाय् न्ह्यूगु जुइ थ्व च्वाकीं ? उपिं पुलुक्क गनं खनेमदु धायवं आम्थे न्हिले मा:ला का...

च्वाकीं:   छ च्वापुका: नं इलय् ब्यलय् तसकं हे तत:धंगु....अन्तर्राष्ट्रिय कथंया जोक कनीगु । अले न्हिले मवइ ला द: ! हि...हि...हि...

च्वापुका: थ्व च्वाकीं नं छु धाइ धया ? जोक धैगु नं नेशनल, ईन्टरनेशनल धैगु दइ ला ह.....उकिसनं जि जोक यानागु हे मदु...अथे न्हिली का ह.....

च्वाकीं:   (न्हिला दिका:) का धासा च्वापुका:....आदिवासी जनजाती धैगु छु ?

च्वापुका:  थ्व च्वाकीं नं अन्दोलनया दिन खुन्हु नं म्वा: मदुगु न्ह्यस: न्यना च्वनी धया...का न्यँ लिस: नेपाली बृहत् शब्दकोशया परिभाषा कथं आदिवासी धैगु गुगुं नं भूभाग, देश वा थाय् विशेषय् न्हापानिसें बसोबास याना वयाच्वंपिं जाति, आदिम निवासी, आदिम जातियात धाइ....अले नेवा: खँग्व: धूकू कथं छु देसय् दकलय् न्हापां बसोबास या:म्ह मनूयात आदिवासी धाइ....का गात ला ?

च्वाकीं:   गा: मगा: धैगु खँ ला व ला छं जिं सिबें व उखुन्हु तिनि सुचीकृत जुपिसं सी मा:गु ख:....संयुक्त राष्ट्रं तक्क पहिचान यानात:पिं आदिवासी जनजातीतय्गु शोषण याना वयाच्वपिं ब्राम्हण क्षेत्रीवादी तय सं थॉं झिगु पहिचान कायम जुइन....थॉं झिगु स्वअधिकार घोषणा जुइन धका: हानं षड्यन्त्र या:गुया ज्वलन्त दसि मखु ल व ?

च्वापुका:  धायबले छधी झी आदिवासी जनजाती संघीयताया पक्षय् जातियताया नामय् पहिचानमा: धका: थॉं आन्दोलन याना च्वना....उखे म्हिग:यापिं सामन्त ब्राह्मणवाद थॉं आदिवासी जनजातीइ सूचीकृत जुया: हानं भूमिपुत्रतय्त हे क्व्त्लेगु ग्वसा: ग्व्याच्वंगु का मखुला ? (आक्रोसं च्वापुका:या ल्हा: म्हूच्युंवनी ।)

च्वाकीं:   ह......आ: तिनि बल्ल छं खँ थुथें च्वनका च्वापुका:.....

च्वापुका: खँ ल जिं न्हापांनिसें थूगु ख:....तर मिखा चाहिं थौं तिनि चालका....

(निम्हं जुरुक्क दना: स्वायेत्त राज्यया मागयासें स: थ्वेका: जुलुसय् वनी ।) 

(नेवा: सन्देश  विक्ली पत्रिकाय्  ने.सं. 1132 तछलाथ्व पारु  (May 21, 2012) खुन्हु  प्रकाशित  जुगु )