(च्वापुका: चाकमकला:गु टेबल दथुइ तया: छ्चा:खेरं मेच घेरय् याना: थ: छम्ह तेबलयात चा:चा: हुलाच्वनी | उबलय् लाक्क लिमला: फमला: च्वापुका: यात गनं यंकेत अन हेतुं थ्यंक: वइ | च्वापुका:या पह: खना: न्यनी |)

च्वाकिं:   अय् च्वापुका:....छु याना च्वनाम्ह छ ....टेबलय् फय्लिंचां थें चा:चा: हुला: म्याजिक चेयरया कासा म्हिता च्वनाम्ह ला छ ? कि गथे ?

च्वापुका: टेबलया ज:ख: थथे फनफन चा:हुला च्वन धायेवंतुं म्याजिक चेयरया कासा हे म्हिताच्वंगु धका: धायेत छु आधार दु हाँ ?

च्वाकिं:  छन्त धा:सा न्ह्याग्गुया आधार मा: बा........आम्थे हे आधार मा:म्ह ख:सा छु आधारय् पार्टीतय्सं राष्ट्रपतियात राजनीतिक पहल यायेमल धका: कचकच या:वना च्वंगु ले ? का फुला छं उमिके आधार फ्वनेत ?

च्वापुका: गन आग्राया खँयात गाग्राया खँय् यंका: तक्यंके यंकूगु.....राष्ट्रपतिं य:सा पहल या य:सा अलमल या जित: छु मतलब .....जित:ला जिगु ज्याय् जकं मतलब दु का ......

च्वाकिं:   छ ला के.पि. ओली पह:वम्ह मतलबी जुलका.....कांग्रेसया पा: धका: छ्प्वा: म्हुतुं नवाना जूसा मेगु म्हुतुं प्रधानमन्त्री जुइत जि नं तयार धका: .....नांगां बाबची पोल:चा खुं पह: वयेक खँल्हाना जुइम्ह मतलबी |

च्वापुका:  स्व च्वाकिं ...थ्व दुनियाय् मतलबी मजूपिं....स्वार्थी मजूपिं जन्तु जनावरं निसें कया: मानवत स्वार्थी मजूपिं सु दु व जित: क्यना बीफुला छं ....अप्व: मतलबी धका: हालाच्वनी .....मतलबी मजूपिसं राजनीति यायेफैला....कृष्ण गोपाल मतलबी मजूसा राजेन्द्र श्रेष्ठं अथे माथ नइ ला ?

च्वाकिं:   छु चापा: चिपा:गु माथया खँ ल्हा:वयाच्वंगु ....माथया विषयलय् हे खँ ल्हायेगु ख:सा थौंकन्हय् बजा:भा: नं थें जनतातय्त माथ नका:च्वंगु सुपर दुपर खँ गनं दै ला ?

च्वापुका:   ध्याच: दुथाय् देका ....मा:गु खँ ला का ....गन छगू ज्याय् इन्गेज जुया च्वनाम्ह मनूयात म्वा:मदुगु खँय् छेर्की लाका: थुनां थुनां चुइक दयेकेत स्वयाच्वंगु जित:.....अथेंला चा:चा: हुला: ब्वाँय् जुया: इक्कुसे च्वंच्वंबले ....

च्वाकिं:   वहे खँय्ला न्हाच:निसें जिं सिइकेत ...थुइकेत स्वयाच्वनागु नि क्या ....छ्हे ख: स्वयम्भूयाम्ह माक: थें लिमला: फमला: टेबलया छ्चाखेरं ब्वाँय् ब्वाँय् जुयाच्वंम्ह मानोकी दक्व कुर्सी थ:त हे मा:थें च्वंक स्नाच्वंम्ह बैद्य बा: थें का छ ला ....

च्वापुका:    अप्व: म्वा:मदुगु खँ ल्हाना च्वनेमते न्हाँ जि नाप – छु जि बैद्य बा: थें गोलमेच सम्मेलन यायेत थथे चाकमकला:गु टेबल तया: चा:चा: हुला च्वनागु धका: च्वनाला छं ?

च्वाकिं:    अथे गोलमेच सम्मेलन यायेत स्व:सा ध्वाक्क ‘गोल’ नैका ....अप्व: च्वापुका: जुया: गोलमेच सम्म्मेलन धका: दुइमदु सुइमदु खँ ल्हानाच्वनी ....सहकार्य व सहमति या:सा मा:गु निक्ती खँय् धर:ग्वाराय् जायेक खँ ल्हाना जुइगु मखु न्हाँ ....

च्वापुका:    वहे सहमति व सहकार्य याकनं जुइमा धका: ला उ स्व हुंकन दथुइ दक्व पार्टीतय्गु घोषणापत्र तया: थथे आह्वान याना: दुनुगलं निसें कामना यासें मनंतुना च्वनागु नि ....

(च्वाकिं नं का अथे ख:सा तथास्तु ! धका: न्हिली | च्वापुकल फनफन चा:हुली |)

(च्वाकिं व च्वापुका: रंगी बिरंगी लं फिना:, ख्वालय नं हाक: पाना: ख्याल: प्याहाँ वइपिं थें सापारुया लसता न्यायेका च्वनी ।)

च्वापुका:  अय् च्वाकिं !...छं छगू खँ स्यू ला हँ ? 

च्वाकिं:    छगू जक छाय् ....जिं ला सम्पूर्ण ब्रम्हाण्डया खँ स्यू ...जि छु नेपा:या नेतात सिबें कम धका: च्वनाला ....अझ उमिसं मस्यूगु तक्कं खँ स्यूका जिं 

च्वापुका:    का अपाय्च: सि हे स्यूसा धालेसा छं ...व महान संगीतइ तानसेनं सितार झन्न थाइबले ...अकबर बादशाहया दरबारे सलंस: मनूत मिखा फुति मयासे ल्वहं थें फिरिक्क मसंसे तिरिक्क महा:सें टकरक्क च्वंच्वनीगु हँ ख: ला ? 

च्वाकिं:    छि.... छि.... छि... छि....गुगु जमानाया पुरातन खँ ल्हा: वयाच्वंगु थ्वं ...आमज्या:गु मिखां मखंगु कमल थापां कनीगु थें ज्या:गु बासिगु दरबारया खँ न्यंवया च्वनागु ....न्यने हे जति मा:सेंलि प्रधानमन्त्रीं राजिनामा बी लाकि मबी, राष्ट्र्पति शासन चलय्  याइकी मयाइ धया थें ज्यागु latest चमत्कारी खँ न्यं ले ...

च्वापुका:   अज्या:गु खँ नं latest जुइ नं चमत्कारी जुइ ...थ्वला regular खँ जुलका ....जित: भचा थाइगु थीगु चमत्कारी खँ कं ले ....Beethoven नं थें जुल अले दुनि व ....व.....

च्वाकिं:    (खँ त्वा:थला:) का न्यँ अय्सा ...व जिथाय् छम्ह बाज्य:ति वंम्ह मनू छम्ह छु ...वं थाइबले हरे ....छ ला छक्क जुइ ...‌‍द्वलंद्व मनूत थ:पिन्सं यानाच्वंगु ज्या चट्ट त्व:ता खुरुखुरु वनीगु धयां ...

च्वापुका:    अहो .....गज्यागु चमत्कार भाई थ्व ! छं ला धात्थें हे चमत्कारी खँ ल्हात बा .....अले अले व मनूनं छु थाइगुले अपाय्सकं द्व्लंद्व: मनूतय्त आकर्षण याये फयेक ?

च्वाकिं:    छु थाइ आ:....उलि नं मस्यूला छ ध्वाँ नं ....वहे का फ्याक्ट्रीया घन्टी थाइगु का त्यांग त्यांग मिंक ...का न्याता जुल फ्याक्ट्री बन्द जुल धका: (न्हिली) हा ...हा.....हा....

च्वापुका:   का च्वाकिं:  छं जित: थौं झंग: ल्हा:साँ जिं छन्त थ्व गाइजात्राया लसताय् च्वयागु म्ये छपु न्यंके मास्तीवल का ....

च्वाकिं:    न्यंकीले छन्त सुनां पनात:गु दु ...वैद्यबा: यात ला पार्टी टुक्रा यायेत पने मफुगु थुगु इलय् सचिव तय्त राजिनामा बीत पने मफुगु थुगु बखतय् ...छन्त सुनां पनिइ ...का न्यंकि .....

च्वापुका:    का बांलाक्क , ध्वाथुइक न्यँ जिगु म्ये - आहा ! गुलि उच्चगु आधुनिक विचार, शिष्टाचार मखु भ्रष्टाचार, राजनैतिक पावरया साक्षात अवतार, वाह ! वाह ! गज्या:गु थ्व चमत्कार .....का गय् च्वं थ्व म्ये ?

च्वाकिं:     म्ये ला ....म्ये ला तसकं तगडा ....recording छगू स्टुडियोय् वना: recording या अले फटाफट रेडियोय् हायेकेगु का न्हिच्छिं व मन्त्रीतय्गु जक भाषण गुलि न्यनेगु रेडियोय् 

च्वापुका:    अहो.....अपाय्स्कं बांलागु का मखु ला जिगु म्ये .....धाय्बले तसकं हिट जुइ थें च्वं का फिलिम सिबें हे हिट जुइ ....मखु मखु जिं स्वय् ला झिगु व 'राजमति कुमति जिके वं सा पिरती' धा:गु म्ये सिबें हिट जुइथें च्वं हला ?

च्वाकिं:   हिट जुइ मजुइ वला जिं मस्यु ...तर जित: चाहिं तसकं अ:पुइका छंगु म्ये रेडियोय् वइबले ...

च्वापुका:    छु अ:पुइ छन्त जिगु म्ये रेडियोय् वइबले ? अँ सिल सिल तय्त अ:पुइ धा:गु जुइका मखु ला ?

च्वाकिं:    छंगु म्ये रेडियोय् वइबले जित: रेडियो ट्याक्क स्यायेत तसकं अ:पुइ धैगु का ह्वाज्य: 

(च्वापुका: यात वातां तया: च्वाकिं ल्यू ल्यू वनी |) 

haiku

हाइकु 

१. चुनाव वल 

नेतातय्  भोजन 

जनता द्याँला 

२. सत्ता चास्नी 

भत्ता मकूगु क:नी 

मन्त्रीया म्हुतुप्वा: 

३. विदेशी व्हिस्की 

लठ्ठ जुइक चुस्की 

डान्स रेस्टुराँ 

   

च्वाकिं भर्सेज च्वापुका: 

(च्वापुका: तसकं गम नया: हिन्दी म्ये 'दुखि मन मेरे सुन मेरी कहना' बोलयागु हेमन्त कुमारं हा:ला त:गु म्येया लसय् नेवा: भाषं प्यारोडी थें याना: हालाच्वनी, च्वाकिं छ्यं ल्हुकुल्हुकु संका: ताल बियाच्वनी ।)

च्वापुका:     दुखि जिगु मन ....अख्तियारं ज्वन ....धन ला वन वन ....इज्जत नं तन ....दुखि जिगु मन ....

च्वाकिं:        वाह च्वापुका: वाह .....थौंला छं तसकं हे स्याम्पुलुगु प्यारोडी म्ये हाला हल नि .....गनं आ: वयेत्यंगु सापारुया तयारी ला मखु ला ? .....मतलब गनं गिनं गाइजात्रे कार्यक्रमय् हा:वनेत रिहर्सल याना च्वनागु लाकि छु ? 

च्वापुका:     झिथाय् नेपा: देशय्  365 न्हि हे गाइजात्रे कार्यक्रम जुया च्वनिगु थासय् रिहर्सल धैगु हे छाय् याना च्वनेमाल .....न्ह्याबलें stand by position का .....धायेसात कि तयार ....

च्वाकिं:     अले अथेख:सा छाय् थापाय्सकं दुखि जुया: थ्व म्ये हालाच्वनाम्ह ले छ ......कि छन्त नं अख्तियार ज्वंवयेत पौ च्वयाहल ? 

च्वापुका:       जि छु भ्रष्टाचारी ख:ला व अख्तियारं ज्वंवयेत ....जिला व गोविन्द बाज्यां जेल दुने च्वना: थथे याना: गुनगुनय्  यानाच्वन जुइ धका: कल्पना यासें हाला च्वनागु का ...

च्वाकिं:       धात्थें हला थ्व सरकारं गोविन्द बाज्या यात अन्याय हे या:गु ख: बा..... बिचराया उलि उलि मछि वर्ष तक्क मास्टरचा ज्या याना ......बाग: प्वा: जक नया: बुढेस कालया लागि धका: मुंकात:गु धेबयात भ्रष्टाचार याना: कमय् यानात:गु धका: धायेगु गुलि तक्क जायेज का ....

च्वापुका:     छंगु छ्यं ....व धेबायात कया: भ्रष्टाचार यात धा:गु ख: ला व: ..

च्वाकिं:     का म्वा:लका अय्सा मछा: मजुइगुया नं छगू सीमा दइ नि ....थ: बा:जुयात अपयसकं माया याना: भौमचां लाखौ लाख cash उपहार ब्यूगु यात नं भ्रष्टाचार याना: कमय् यानात:गु धन दौलत धायेत मछा: मजू ला थ्व सरकार धया ? 

च्वापुका:   उल्टि गंगा धैगु स्यूला छ च्वाकिं नं ? ....उपहार धैगु बा:जुं भौयात बी लाकि भम्चां बा:जुयात बी ? ...अ:ख: फय् मजूला ? 

च्वाकिं:      अ:ख: स:ख: जिं  मस्यु ...modern जमानाय् modern खँ जुइ धैगु जक स्यूका जिं ....महाभारतय्  च्वयात:गु दु ? क्या ....बिचरा अमेरिकाय् च्वंम्ह काय् नं बौ मन्त्री जूसां नेपा:या मन्त्रीतय् अमेरिकाय् ज्या याइपिं पिउनं नइगु तलब सिबें कम तलबं standard maintain यायेमा: धका: सिया: लाखौ लाख दां बौयात छ्व्याहलं  श्रोत क्यनेमा:हँ ...छु धैगु खँ थ्व ? 

च्वापुका:    छु धैगु खँ थ्व धैगु मस्युला छं ...जि ला अचम्मका ....थ्व धैगु खँ भ्रष्टाचार का भ्रष्टाचार ....गथे गुप्ताजीया भ्रष्टाचार ....अथे हे गोविन्द बाज्या या नं भ्रष्टाचार ....वाग्ले बज्या यात भ्रष्टाचार यात धका: जेलय् तयाज्यू ....गुप्ताजीयात भ्रष्टाचार यात धका: जेलय्  छ्वये ज्यूसा गोविन्द बाज्यायात जेलय् चलान यात धका: बबाल यायेमा:गु छाय् छं ? 

च्वाकिं:      जिं छाय् बबाल यायेगु ? ...बबाल डट कम ला अख्तियारं यानाच्वंगु दु हे दुनि.....जिगु चासो धैगु थज्या:पिं  भ्रष्टाचारी तयत ल्यतुल्यया: जेलय् कवचय् यायेगु शुरु यातकिं जेलय् तयां तयेथाय् दइमखु धका: चिन्ता का जि .....

च्वापुका:      चिन्ता कायेम्वा: च्वाकिं ....खुम बहादुरया नं पा: वयाच्वंगु दु ....अज्या:पिं दर्जनौ न्ह्यंकेज्युनि जेलय्  अझ ।

(च्वापुका: नं हानं न्हाच:यागु हे प्यारोडी हाला है ....च्वाकिं नं तालय्  छ्यं संकी ।)